«Արվեստասեր» կայքի սիրելի ընթերցողներ, մենք արդեն առիթ ունեցել ենք Ձեզ ներկայացնելու փոքրիկ Անի Պողոսյանի աշխատանքներից մեկը, որը նա նվիրել էր իր սիրելի Մայրիկին՝ Կանանց միջազգային օրվա առիթով: Ահա Անիի հերթական նկարը, որը նույնպես տեղ է գտել մեր կայքում: Վիրավոր աղավնու պատկերող այս նկարով Անին մասնակցելու է «Մենք տարբեր ենք, բայց ընկերներ ենք» խորագրով նկարչական մրցույթի, որը վեր է հանում ֆիզիկական թերություններ ունեցող երեխաների խնդիրները: Անին այդ խնդիրը պատկերել է վիրավոր աղավնու տեսքով, որը, սակայն, անպայման ապաքինվելու է: «Արվեստասեր» կայքը փոքրիկ նկարչուհուն մաղթում եմ հաջողություն՝ մրցույթում և, իհարկե, նոր աշխատանքներ:

«Արվեստասեր» բլոգ-կայքի սիրելի ընթերցողներ, այսօր մարտի 8-ն է՝ Կանանց միջազգային օրը: Գարնանային այս գեղեցիկ տոնը ոգեշնչում է բոլորին՝ շնորհավորելու սիրելի Մայրիկներին, Քույրիկներին, Տատիկներին, ընդհանրապես՝ բոլոր Կանանց և Աղջիկներին: Շատ-շատ երեխաներ այսօր ուրույն և անակնկալ ձևով են շնորհավորում իրենց Մայրիկներին: Ահա, օրինակ, 9-ամյա Անի Բենիամինի Պողոսյանը մի գեղեցիկ շնորհավորական բացիկ է ձևավորել, որում իր կողմից գրված բանաստեղծությունն է՝ նվիրված սիրելի Մայրիկին: Աղջնակի անկեղծ ու սրտաբուխ տողերը Մոր նկատմամբ անհուն սիրո գեղեցիկ արտահայտություն են: «Արվեստասեր» բլոգ-կայքը սիրով միանում է շնորհալի Անիին և ջերմորեն շնորհավորում բոլոր Մայրիկներին՝ մաղթելով առողջություն, երջանկություն և երկար տարիների կյանք:

«Արվեստասեր» ստեղծագործական կայքը սիրով ներկայացնում է Վոլոդյա Կարենի Ղազարյանի նկարները: Վոլոդյան ծնվել է 2008 թվականի նոյեմբերի 25-ին Երևանում: Սովորում է Նոր Նորքի Ա. Միկոյանի անվ. հմ. 166 միջնակարգ դպրոցի 2-րդ դասարանում: Իր էությամբ ընկերասեր է, բարի, ակտիվ ու աշխույժ, իսկ ումսան մեջ՝ առաջատար:
Վոլոդյան սիրում է նկարել և իր նկարներում յուրատիպ կերպով արտացոլում է իրեն տպավորված մտապատկերները, տեսարանները, կենդանական աշխարհը, հեքիաթների հերոսներին: Փոքրիկ նկարչի աշխատանքներում նկատելի են ուրույն գունազգացողությունը, գույների համադրության ընկալումը, գծապատկերների ճշգրիտ արտացոլումը և պլաստիկան: Նա նկարում է գունավոր մատիտներով, յուղամատիտներով (մոմամատիտ, պաստել), ջրաներկերով: Վոլոդյայի հերոսներն արտահայտիչ են, կենդանի ու, ասես, շարժվում են: Այդ հերոսներին նա պատկերում է ստվարաթղթին, ալբոմներում, հաճախ նաև ինքը նկարազարդում է տնային աշխատանքի էջը դպրոցական տետրում:
Բացի նկարչությունից, դասերից ազատ ժամանակ Վոլոդյան նաև շատ է սիրում կարդալ, պարել, վարել իր սիրելի հեծանիվը և դիտել մուլտֆիլմեր, որոնց հերոսներից շատերը, ի դեպ, հետո իրենց արտացոլումն են գտնում նրա նկարներում: Հետաքրքրությունների շրջանակում առանձին տեղ են գրավում կենդանիներն ու կենդանիների մասին հաղորդումները: Վոլոդյան վայրի բնության ներկայացուցիչներին պատկերում է ամենայն խնամքով, փորձելով ցույց տալ նրանցից յուրաքանչյուրի յուրատիպությունը:
Հատկանշական է, որ Վոլոդյան բազմաթիվ այլ նախասիրություններ էլ ունի, նա լրջորեն զբաղվում է կարատեով, շախմատով, լողով, իսկ ահա ֆուտբոլը մի առանձնակի տեղ ու նշանակություն ունի նրա համար:
«Արվեստասեր» ստեղծագործական կայքը մաղթում է Վոլոդյային հաջողություններ կյանքում և ստեղծագործական վերելքներ, որպեսզի նրա նկարչական ձիրքը անպայման զարգանա, և մի օր հանրությանը ներկայանա իր հասուն ու նույնքան անկեղծ, գունագեղ ու կենդանի աշխատանքներով:

ՎՈԼՈԴՅԱ ՂԱԶԱՐՅԱՆԻ ՆԿԱՐՆԵՐԸ